E şana na alafişa idanen
Upiyari ini tzarepe şvanen
Sevdali na oran muradi anen
Şǩuni şena yalan dunya zindani
P̌eya alafişa munde vidaten
Vidasit ǩartiǩarti mevindvaten
Şǩu soğuni masǩara cevidvaten
Şǩuni şena yalan dunya zindani
Moy va ğobum Kvakçeşi çayirluği
Şǩimi st̆eri giğuran-i darluği
Mu voğoda ma hast̆eri sağluği
Şǩuni şena yalan dunya zindani
Çayiri yukite gza na memagi
Memagisi meft̆i xepe kogaǩni
Xe gaǩnisi odardalu keyaǩni
Mo gaşǩurinert̆ay sevdali-şǩimi
Moy var dodum him xalǩali drap̌p̌ani
Meganç̌uşa dologabart̆u ali
Govağari sǩani loya xarayi
Kogamaxt̆i hayde mendegiyona
Cuzi moxtay pavrepe ceğurasen
Nena-şǩimi aşǩva va digurasen
Aya mitzvi çoyi mi va ğurasen
Haşşo cemozurt̆ey e nana-şǩimi
Pencereşa mazin yerepe-şǩimi
Alayi dimordey berepe-şǩimi
Zehiri konuzun xurt̆uli-şǩimi
Haşo cemozurt̆u e nana-şǩimi
Amelyat̆t̆i viya va maşǩurinen
Xast̆aluği-şǩimi t̆ǩva goşǩuriney
Muti var on t̆oxt̆ori goşǩuriney
Haşşo cemozurtey e nana-şǩimi
Ordo cemolumcu domayu seri
T̆oxt̆orepe mitzvey ciğer ǩanseri
Bazi çere bet̆t̆e maç̌ven him yeri
Haşşo cemozurt̆ey e nana-şǩimi
Xast̆axane ǩoridori serin on
Yara şǩmi zuğaşa-ti derin on
Yao va mazit̆t̆en mturişa in on
Haşşo cemozurt̆ey e nana-şǩimi
Beyari komoxt̆u xolo xaşǩuman
Yaǩa kocemxedu va memaşǩuman
Dosya doǩaçeri moy gomoşǩuman
Haşşo cemozort̆u e nana-şǩimi
Adnan SAYMAZ/ Xaǩu
