Yaşar Bayraktar*
Ǩişi komoxtu dort̆un, ora ini t̆u. Oput̆eşe noğaşa kogextes dort̆un ǩoçepe. Dido mtsika dopskidit dort̆un oput̆es. Ǩat̆upe, coğorepe tzoçimuşinesi var doskidurt̆un. Gverdi piçveri t̆es.
Xolo heşo ar dgas ar coğori komoxtu avla çkimişa. Uca tomoni t̆u. Ǩoçişen var imt̆ert̆u. Dodgitu do motzǩedu. Emtzǩadumtu tolite. Bucoxi:
“Aya moxti!” ma butzvi.
Nena var vu. Xolo motzǩert̆u.
“Gamşkorinu-i, dzğeri re-i ?” ma do buǩitxi.
Xolo nena var momçu. Nena var vu. Var vu, ama tolepes xolo dolomtzǩet̆u. Haya, ma ptkvi, korba p̌iç̌veri uğun do var atkven. Ar gyari komepça, ma. Elebut̆axi do kovalişi gverdi komepçi. P̌icite ezdu do jilendo kelaxtu. Oç̌ǩomu kovali. Eǩatzkederi eǩatzǩederi igzalu.
Jur orasti komoxtu. Gyari mepçi, oç̌ǩomu, komotzǩedu do igzalu xolo.
Ar dğas xolo komoxtu. Mtviri kododvu dort̆un avlas. Gale var gamilert̆u initen.
“Çati.” ma butzvi; “Ǩai gurite na moxti. Muç̌o re?”
Ncoxo muşi kodobiguri dort̆un. Çkimda komoxtu do ti kelemidu ǩuçxes. Ma-ti tis xepeten kogelebusvi, bere steri. Gyari ç̌ǩomeri re-i, ma do var pǩitxişa. Elap̌t̆axi kovali do komepçi. Var otzǩedu çkar gyaris. Ti kogeyiğu, guri t̆axeri ar komotzǩedu.
“Mu gağodu Çati?” ma butzvi
“Ma gyari şeni var mopti. Ǩoçi çkimi re, ma do mopti. Ma teli oras gyari kobdzirum. Ǩoçi va bdzirum skani steri. Heya şeni mopti skanda.”
Mu butzvare var matku, gobişaşi. Haya yetimi steri na botzǩert̆i do hatzi oncğoreten dobimç̌itani, dobikçani. Let̆aşa geptiǩo do haya var mağoduǩo!
“Domatku, domağodu. Guri gemaç̌u. Ma hatzi si mu gitzva. P̌icis muç̌o gotzǩeda?” ma butzvi.
“Hantere tzut̆a dulya ren. Guri ǩaite giğurt̆as. Ma ǩai bore.”-ya mitzu.
Amtsika dobiraxati. Kovali, let̆aşen kebzdi do dobuşenaxi. İgzalu eǩitzǩedu. Tolepe uçart̆u.
Xolo ar seris dido inirt̆u. Tzǩari doǩrotu dort̆un otsxones. Mtviris, ǩuçxe var geyilamt̆u. Dido ǩap̌et̆i divu dort̆un mtviri. Ocağis dişǩaten opşa t̆u. Dot̆ubu dort̆un oxori. T̆ilivizyonis filimi seyri bikomt̆i. Neǩna elintzǩu tamo tamo. Ar kobotzǩedi, na mulun Çati ren. Na madziru, var adziru. Çkar nena var p̌i. Çkar var botzǩedi. Moxtu kelemixedu memsofas. Xolo var botzǩedi, filimiş meşaşeri bore steri kopxert̆i. Tatite memopantsu mxucis.
Var bogni steri p̌i xolo. Xolo memopantsu. Xolo var botzǩedi. Memontxu tatiten. Ar kogolap̌tzǩedi do:
“Ooo! Mundes moxti ǩoçi çkimi.” ma butzvi
“Nako ora ren hako pxer. Çkar var motzǩer.”-ya mitzu.
“Heşo-i? Na moxti var oxobotzoni.”
“Mutu ginon-na, bağu so ren kogiçkin. Vana filimis otzǩedi. Dido mskva ren.” ma butzvi.
Filimi içoduşa var bisinapit. Diçoduis:
“Hamseri hak dodgitiǩo ǩai ren. Gale dido ini ren. Miti haşo inis gale var gulun.”
Hem seris çkimi-ǩala kododgitu. Ordoşe ebiselit. Ma gyari pxadzirişa heya gondunu. Uǩaçxe moxtu. Çkimi-ǩala gyari oç̌ǩomu do igzalu.
He tzanas Çati-ǩala ǩai bort̆it. Dido ǩai dğalepe miğurt̆es.
Ar tzana şǩule xolo komopti. Çati var t̆u. So ren, ma do telis p̌ǩitxi. Mitik var mitzu, mu ağodu. Uǩaçxe bogni na ğuru doren.
* Yaşar Bayraktar (1950 – 5 Aprili 2024), Lazi ressami do maç̌are. Vitzeşi Mzuğu kyois dibadu. İst̆anbolis Tatbiki Güzel Sanatlar Fakulte iǩitxu. Lazuris dido oromt̆u do ç̌it̆a hekayepe ç̌arumt̆u. Lazuri kulturişi temapete resimepe ğarumt̆u. Ğuriş xarmelobate domiğures.
