Vildani Manelişi
Şuri migadu-i?
Hem p̌at̆i ren aya hemi–ti ǩai. P̌at̆i ren eşo doxedana puci-steri,gulincirana golaxunu skanis, ekole akole iktana “ofi do pufi” ya do.
İya yezdip, var niǩardep; dodumer. Aya yezdip, nunǩu gendzikup; dodumer. Ofi do pufi, ofi do pufi. Odaşa, çeçmeşa, ogyaraleşa
(mutfak).Ekole, akole.Oǩule? T̆riǩi mǩule!
Televiziyoni gontsǩip, tsxont̆u tsxont̆u ar ǩanalişen majuranişa. Ambarepes usibin, guri skani domtzǩupun; dizepes otzǩer, tiskani dogibuzgun. İya aya, iya aya; dicuncure iya ǩuti ǩala.
Em oras yisel, bilgisayari gontzǩip. Emu amu ǩala ğarğalap;emuşi amuşi resmepes otzǩer,tude mutxanepe ç̌arup. Mutxanepe ister.
Ar- jur ndğa
Jur-sum ndğa
Sum –otxo.
Diçodu çkva!
“Mu?”
Nanaskani. Skidala!
******
Dido şuri mimadu andğa!
Xolosimuşişen ğali na gyulun, penceremuşişen raǩani do germape na idziren oxoriçkimişi doloxe; ǩurbetis na ren enni “mzoğauça” oxoriçkimişi doloxe. Şuri mimadu,mimandaru andğa!
Ğalişi xoma var domibağu, raǩani do germapeşi yeşili, mjoraşi t̆ibu var domibağu; andğa dido şuri mimadu!
Xut deǩiǩeşa noğas viqve ǩuçxeten ama var vidi. Ǩvinçepeşi obiruti ,na domiserinu ixikti var domibağu; andğa dido şuri mimadu!
Dopxedi, gulavinciri, tavla visteri.Gyari p̌ç̌ǩomi, tzǩari pşvi, televiziyonis vusimini, bilgisayaris vibodi.
Varmiǩamilu!
Şuri mimadu!
T̆ilifoni voğodi manebrapes; viğarğalit, viditsit.A ah! var igzalu, kodiçoku, şuri mimandaru. Nanaaaa! Atzi mu p̌a? So vida? Mişen do muşen medi vaǩvanda?
Şuri do gurik mibandals!
Kodopxedi. Ekole akole vitzǩedi. Em oras ar mutxani nçaxu tiçkimişi doloxe. Mundeşen doni visimadept̆i ama andğa t̆u ǩismeti.
Mu p̌i?
Ar ç̌it̆a mutxani.
Mara iya ç̌it̆a mutxanik dido ondepe duktiru guri-çkimis.
Mu p̌i?
Na yep̌ç̌opişen doni duvaris na itzǩert̆u golaxunu( kanepe)-çkimi ar mtsika vokti; atzi gale,raǩani do germapes otzǩen. Manti eşo; dopxedu votzǩer, gulabcan votzǩer. Atzi bittum germa do ntsa madziren. Ntsas ǩvinçepe, ntsas xçe do xçe mpulape madziren. Ncaepe, ncaepeşi pukiri, meyve do but̆ǩape madziren. Ç̌umani mjora, seris tuta madziren.
Mu p̌i?
Ar ç̌ita oxovinǩani, oxovonǩani.
Atzi, oxoriçkimis, atzi guriçkimis daha dido tanura skidun, daha dido tanura!
Hayde;
Ǩatta xoroni giç̌ǩen ar xoliten!( adım)
9 Mbulora 2012 / Bursa
